靈幻時間

在鬼故事中都常常提及動物可以看到人類所看不到的 "超生命體"，所以動物往往會向牠們見到的靈體作出防衛的反應，就好像見到狗隻會向著空地瘋狂地吠叫，總會叫人毛骨悚然~~~~

世估唔到這個情形終於發生咗係我屋企，一個星期前一個夜晚 (當時大約係10點半左右) 當我和姐姐在家中看電視時, 我屋企嗰隻至叻食、玩同瞓的 "毛毛" 無端端係咁對住個廳嗰個窗口狂吠, 當時我地好自然咁以為窗外邊係咪有什麼唔妥當，所以就 "中" 去窗口望吓，不過又唔見到有什麼特別，又冇行雷閃電，所以就只係口頭驚告咗毛毛唔好亂吠嘈親隔離鄰里。當時我地都以為係毛毛太百厭，想吸引我地注意。但係這個亂吠的情況仍然間間斷斷咁係嗰晚出現，但係每次我地往窗外望又唔見到d乜野，想著想著就令我諗到會唔會窗外邊係有d污遭野呢.......所以嗰晚待姐姐一家離開之後，得我一個係廳嗰時，都唔係好敢望出去窗口，而且重越諗越心寒，所以12點都未夠就死返入房瞓......

經過一晚驚驚地之後，第二朝我就如常咁返工喇。但當我放工返到屋企既時候就發現廳個窗用咗張報紙封住一邊，當時第一個反應係 "唔係咁邪呀.....唔係要封住d污遭野卦....報紙遮唔遮到架?!....."。跟住就走去問Daddy做乜要封住個窗呀? 當時譚先生就用好平靜的語氣同佢個女講 "唔封住個窗，咁阿毛毛走上 "Sofa" 就會見到自己係窗上的倒影，以為有另外一隻狗係窗外，所以會係咁吠架喇....."。就係咁這個靈幻疑雲就解開咗喇!!!

係這件事之中，再次證明毛毛係蠢蠢地既動物，不過身為佢既主人既我都唔醒得去邊.......就因為毛毛攪到我白白地驚咗一晚，所以我現在就成鬼日取走張報紙，對住個窗做d倒影嚇吓佢，哈哈.........